സ്വപ്നങ്ങളുടെ ജേർണൽ

ആർത്തലച്ച് മഴ പെയ്ത ഒരു ഡിസംബർ രാത്രി. മദ്യപിച്ച് തൻ്റെ ലോഡ്ജ് മുറിയിലേക്ക് നടന്നു പോകുന്ന, വിരസതയിൽ നനഞ്ഞു ജീവിക്കുന്ന ഒരാൾ. ലോഡ്ജിന് അടുത്തുള്ള ഇടവഴിയിൽ നിന്ന് അയാൾക്ക് ഒരു ഡയറി വീണുകിട്ടുന്നു.

മുറിയിലെത്തി ഡയറി തുറന്നു നോക്കിയപ്പോൾ, ആദ്യ പേജിൽ കണ്ട പെൺകുട്ടിയുടെ പേര് അയാൾക്ക് പരിചിതമായി തോന്നി. മറ്റൊരാളുടെ സ്വകാര്യതയിലേക്ക് എത്തിനോക്കുകയാണെന്ന തോന്നൽ, അടക്കാനാവാത്ത ആകാംക്ഷയിൽ മുങ്ങിപ്പോയ ഒരു സ്വാർത്ഥ നിമിഷത്തിൽ, അയാൾ ആ ഡയറി വായിക്കാൻ തുടങ്ങി.

ഡയറിയിലെ പേജുകൾ മുഴുവൻ ഒരു പെൺകുട്ടി കണ്ട സ്വപ്നങ്ങൾ ഓർത്തെടുത്ത് എഴുതിവെച്ചതായിരുന്നു. പേജുകൾ മറിയുന്നതിനൊപ്പം സ്വപ്നങ്ങൾക്കും യാഥാർത്ഥ്യത്തിനുമിടയിലെ നേർവര പതിയെ മങ്ങിത്തുടങ്ങി…